أقامت عائلة رئيس الكتلة الشعبية الراحل الياس سكاف قداساً وجنازاً في ذكرى مرور 40 يوماً على وفاته، في كنيسة مقام سيدة زحلة والبقاع ترأسه الأب طلال تعلب يعاونه أباء وكهنة المقام، وحضره السيدة ميريم سكاف ونجليها جوزف وجبران وعائلة سكاف.

وبعد القداس الذي تلا خلاله نجلي الراحل الياس سكاف جوزف وجبران النوايا، ألقت السيدة ميريم سكاف كلمة جاء فيها:" كل شي هون رح يقلك إنو.. اشتقتلك.. وإنو جوزف وجبران عم بيفتشوا صبحية ع عطرك.. وإنو ناسك يا ايلي عم بيقشعوا بعيونك.. عم بيشوفوا الدني ريشة انت راسما قبل ما تفل. هودي الناس المحبين الطيبين ما بيلبقن ينطفوا.. ورح يطلعوا عالضو.. عالريح عالحرية.. والزينة الي رافقتن ع أيامك رح تتعلا.. وساحات ولادن رح يرتفع فيها فرح العيد.. ميلادن مش رح يتأجل.. وشجرن كل ما يضوي كل ما روح إيلي رح يغمرها الرضا."

وأكدت سكاف:" قرارنا إنو نزين زحلة.. وعلى شجرها نلمح طيف إيلي عم بيلوح بإيدو وفرحان انو مش بيتو بس المفتوح للناس.. وشوارع مدينتو كمان مفتوحة الن.. وليلها بيلمع متل نهار .بركي بهالخطوة بندلل الحزن.. بنمسح عن وجوه أطفال نِتفي من الأسى الي عم ينفرض عليهن. هيدا حلمو ورح بنكفيه.. عم نمشي ع دربو.. عم بنطّلع بوصايا ما فيها الا الالتقاء ع المحبة لمصلحة هالوطن.

وإذا كان في فئات قليلة عم توقف بوج هالحلم.. فبنوعدن إنو كمان رح نِحْتكم لناس زحلة الي بتعرف كتير وين وكيف تعبر عن رأيا وع توقيتا."
وتابعت رئيسة الكتلة الشعبية:" ما حدا رح يرسلمنا طريقنا.. وبأول كلام سياسي بقولوا رح اضطر كرر جملة قالا إيلي سكاف: زحلة حيطا مش واطي.

إنتبهوا ع السياج الي عم تقطعوه.. لانو في وراه شعب بيدافع عن أرضو وكرامتو وهويتو وموقعو بالوطن.. وما رح نسمح بمصادرة قرارو وعدم تمثيلو.. محلو لازم يكون محجوز.. مطرح ما بيكونوا رح بنكون.
وإذا كان هالشعب بالاربعين يوم أحترم حزنو فهيدا ما بيعني انو ما عندو كلام يقولوا.. ما عندو اكتر من عتب وغضب ع جهات اندست من خلف الحزن.. وراحت تخطط لحصر إرث سياسي.
لأ.. هالمهمة أتركوها لأهلها.. فزحلة للكل بس مش لمنتحلي الصِفات... مهما تخفّوا بوساطة السما.. وإستثمروا بموت الكبار.. أشترطوا.. هددوا.. إجتمعوا.. قسموا.. ووزعوا المغانم السياسية بإيحاءات خارجية".

وأضافت:" أربعين نهار من الظلم بحقنا.. حتى وصل هالظلم لإيلي بغربتو ومطرح ما هوي غافي.. وامتدت الايدين على قداس الأربعين مع تهديدات كانت ما عم توفر حتى الصلا والي عم يصلّوا لروحو. بعد الاربعين كلام تاني.. كلام بيشبه صلابة أهل هالمدينة وشموخها وعنفوانها.
بعد الاربعين في إيدين ممدودة للكل بس كمان في إيدين ممنوع تمتد علينا وتخترق حزننا لتسرق قرارنا.
وتوجهت إلى الحاضرين:" يا أهل زحلة الطيبين.. انتو أصحاب القرار.. وهالبيت المفتوح بيستمد قوتو منكن ومن محبة بتكفينا كل الدهر. محبتكن هي كتلتنا.. فَ بنحب نطّمن الجميع إنو مخزونا ما بيخلص.. وقادر على جمع خيوطو على أطياف الوطن.

فمعكن.. نحنا شراكة عمر.. ووحدة حال.. حلو ومر.. دين ووفا.. وهالمزايا كلا عندا فرصة لتكون ع وسع هالبلد المسروقة فرصتو بالحياة."
مؤكدة:" مشاريعن قدرنا ورح نقدر نجمّدها من أسفل ارضها لأعلى جبالها .. بس هالقداس اليوم لروح إيلي سكاف أسمى من سيرة فئات ما بتعرف من الوطن الا شو رح يطلعلا منو..وبتشقفّوا من قلب صخروا .. فئات ما بتعطي بس فيها تترك وطن بلا مؤسسات وبلا رئيس.
وصرنا نشتاق لخبر حلو يكسر هالحزن العام .. ويمكن ما في أحلى من أنو أربعين ايلي يحمل معو تاريخ لحرية نطرناها كتير .. ويكون هالنهار آخر يوم من مأساة خطف العسكر .. على أمل انو تكتمل المسيرة بإطلاق سراح بقية المخطوفين بهالجرد .
ومن حكاية الاسر الطويلة بنأكد انو الحرية بكل أشكالها هي خيارنا وفئة دمنا .. وما بيربطنا بأسرى القرار أي رابط .

ما رح نتبّع طرقاتن.. النا دروبنا الي رسموها الاباء والاجداد الي راحوا.
وختمت :" وبأربعينك أيلي.. انا وجوزف جبران وكتلتلك وناسك بنقلك أنك وصيتنا نكفي.. وبعد الاربعين ما يستعجلوا.. رح بنخبرن كيف بنكفي."

وفي الختام تقبلت العائلة التعازي في صالون الكنيسة.