فاجأ الممثل وكاتب مشارك في فيلم كتير كبير آلان سعادة جميع المشاهدين والحضور الذين كانوا يتابعون حفل توزيع جوائز الموركس دور باعتذاره عن قبول الجائزة عن أفضل فيلم لِعام ٢٠١٥ مباشرة على المسرح ومغادرته دون استلامه للجائزة.

وفي التفاصيل، واثناء اعتلاء الممثل الآن سعادة المسرح لاستلام الجائزة توجه الى الحضور بكلمة جاء فيها:

"الغلط بيبقى غلط ولو مين ما كان مستفيد منّو؛ متل ما الصح بيبقى صح ولو مين ما كان ضدّو أو منضرّ مّنو… يعني الغلط غلط والصح صح!
وبس تنضل كلنا عَ نفس الموجة بهيدا الموضوع، في سؤال سريع:

الحق، العدل والنزاهة هول صح، صح؟
إستغلال الناس، النّفاق والفساد هول غلط، صح؟
إذا واحد ماشي بالغلط، والمجموعة يلي حولو مستفيدي من هيدا الغلط، ما حدا لح يحكي، وما في شي لح يتغيّر!
يمكن بيطلع بيحكي حدا، شي مرة ما طلع مستفيد من الغلط وببلش يتهم غيرو ويوعظ بالعفة…
بس الكل بيعرف إنو هيدا فاقد مصداقيتو لأنو يوماً ما، لما كان مستفيد من الغلط، سكت، بس هلّأ لما بطّل مستفيد طلع حسّو!
وفي كمان يلي قبلو يشاركو بهيدا الغلط، بس لأن بدّن الصّرفي أو ما بدّن حدا يزعل.
هيدا بينطبق بالسياسة وبالأمن وبالإعلام وبالحياة اليومية، ومع الأسف، كمان بينطبق بالفن… الفن الهابط أكيد.
الفن الهابط موقعو صعب وما حدا بيحسدو عليه؛
موقعو صعب لأنو الفن الهابط بيطلع من مجتمع هابط وبنفس الوقت الفن الهابط بولّد مجتمع هابط.
فإذاً شو الحل؟
نحنا ما عنا جواب، نحنا عنّا أسئلة
ولح نضل نسأل هيدي الأسئلة، ومن ناحيتنا، لح نرفض نشارك بالغلط ولو كنّا مستفدين منّو!
بإسم المخرج ميرجان بوشعيا وبإسم منتجي الفيلم كريستيان ولوسيان بوشعيا – شركة كبيريت للإنتاج وبإسم المنتج والمؤلف الموسيقي ميشال ألفتريادس وبإسمي أنا الآن سعاده: شكراً على هيدي اللفتة ولكن، منعتذر عن قبول هيدي الجايزة حرصاً على مصداقيتنا تجاه أنفسنا أولاً وتجاه الرافضين المشاركة بكل الغلط لي عم يصير بهيدا البلد!”

وخلال القاء “آلان” لكلمته حاول التقنيون التشويش عليه من خلال بث موسيقى وكأنّها محاولة لقطع كلامه إلا ان “سعادة” اكمل حتى النهاية واعتذر وغادر.

وعلم ان فريق عمل “فيلم كتير كبير” احب ان يسجل موقفاً من على منبر الموركس دور رفضاً للفساد والنفاق واستغلال الناس والفن الهابط المستمر في المجتمع وليست ضد جائزة “الموركس دور” والدليل ان “سعادة” شكر الموركس على هذه اللفتة ولكن رفضاً لكل الاخطاء في البلد احب فريق العمل ان يكمل الرسالة التي بدأها في الفيلم وان يرفض استلام الجائزة كي لا يُحسب عليه انه مع استمرار هذه المنظومة الهابط.

وكان لافتاً وللأسف عدم تفهم احد اعضاء لجنة الموركس دور جوزفين حبشي لموقف آلان سعادة ولم تكن على مستوى كبير من عمق الرسالة التي وجهها خلال الحفل وتوجهت له بكلام صغير لا يليق بها كعضو بلجنة الموركس دور عندما قالت بفوقية ولؤم “ان تصرفه زغير كتير”