ليبانون ديبايت - بوب

بعيد الميلاد وأعياد الميلاد بْتهدي اولادك ألعاب بحبّوها، بس ما بتوقف هون! لأنّ أوّل ما تنزل لعبة جديدة عالسوق ويشوفوها مع أصحابن، رح يطلبوها، اليوم في الـ PS4 والـ VR ومجموعة الكتب والفيديو لـ Diary of a Wimpy Kid ومين بيعرف بكرا شوفي شي جديد!

علّم اولادك قيمة المصاري على بكّير، كيف؟

خلّي مصروف اولادك يزيد أو ينقص بحسب أفعالن مثلاً فيك تزيد مصروفن إذا خلّصوا دروسن أو إذا نجحوا بالمدرسة بس إذا حسّيت في أيّ تقصير منّن بالمدرسة، بالدرس، بالفحوصات، أو بأيّ شي بقوموا فيه، فيك تنقّصلن المصروف تجميع المصاري كتير مهمّ. علّم الصغار يجمّعوا بـ "الإجّة" والكبار بحساب توفير. شجّعن يتركوا قسم من مصروفن على جنب، وبس يشوفوا كيف مصريّاتن عم تزيد بيتحمّسوا أكتر.

تحديد الهدف بشجّعن على تحقيقه. لازم يتعبوا ليحصلوا على غرضن لو كان مجرّد لعبة صغيرة و أكيد ضمن المعقول. اطلب منّن يحددوا شو بدّن يشتروا وهيك رح يعملوا المستحيل ليحصلوا عليه.

متابعة تقدّمن خطوة بخطوة لأنّ وقت يكون عندن سبب للتجميع، فيك ترسملن خطّة ليتابعوا تقدّمن، وإذا ما قدروا يجمعوا المبلغ المطلوب، فسّرلن السبب وكيف معقول يجمعوا أكتر بالمرّة القادمة.

وقت بيعرفوا اولادك قيمة المصاري، رح يعملوا المستحيل ليحققوا أهدافن، ساعتها فيك تعلّمن طُرق مختلفة ليجمعوا ويشتروا شو ما بدّن.