بدّك تفتح شغل على حسابك؟
بدّك تفتح شغل على حسابك؟
ليبانون ديبايت   |   2016 - تشرين الأول - 07

في أجمل من إنّك تكون إنت مدير شركتك وما حدا مدير عليك، وتكون قادر تتحكّم بجدول أعمالك وتستثمر وقتك بأشياء بتحبّها، ويكون الفضل إلك وحدك بنجاح أيّ مشروع بتقوم فيه نتيجة مجهودك الخاصّ؟ بس إنّك تبلّش بمشروعك الخاصّ مش شي سهل وإلّا كانت كلّ الناس وظّفت حالها بحالها وصاروا كلّن مدراء.

فإذاً قبل ما تغوص بعالم الأعمال، استفيد من تجارب روّاد الأعمال يلّي سبقوك، ونحنا بدورنا رح نقدّملك 10 مبادئ أساسيّة بتساعدك لتنجح بمشروعك وتكون خارج المعادلة!

اعلان

1. قوم بمشروع بتحبّه

عندك فكرة كم ساعة رح تخصّص لمشروعك؟ بالبداية، ممكن بسهولة تشتغل لمدّة 12 ساعة باليوم على مدار الأسبوع. لهيك كون أكيد إنّك عم تقوم بمشروع بتحبّه لتتحمّس إنّك تطوره، لأنّ النجاح بلا شغف محكوم عليه مسبقاً بالفشل.

2. ما تتنازل عن القيم كرمال المصاري

مين فينا ما بحبّ يطلّع مصاري وما بيتمنّى يكون غني. بس ما تبخل على القيم والمبادئ على أمل إنّك تحقّق أرباح أكبر. هالشي رح ينقلب ضدّك ويخلّي زباينك يلاحظوا طمعك وينفروا منّك، لأنّ ما حدا بحبّ يشتغل مع قراصنة.

3. دايماً اتسمّع لزباينك

مش ضروري تصمّم حلّ خاصّ لكلّ زبون من زباينك. بس تذكّر إنّه الأعمال الناجحة بتكون مبنيّة على العلاقات القويّة يلّي بتطلّب منّك تتسمّع لمطالب وحاجات الزباين بكتير من الدقّة والجديّة لتقدر تقوم بتنفيذها. فإذاً تسمّع أكتر للزبون واحكي أقلّ.

4. قدّم حالك صحّ

بتعرف مين من أشدّ المعجبين فيك؟ إنت. لأنّك إنت أكتر واحد قادر تنتقد حالك بقساوة وبنفس الوقت تقدّر حالك. وإنت بتعرف إنّه ما حدا رح يشتري منتجك الخاصّ إذا مش سامعين فيه من قبل. فإذاً كتير مهمّ تعرّف زباينك على الخدمة المميّزة يلّي عم تقدّملن ياها وتفسّرلن ليش هيّ كتير أساسيّة.

5. حدّد مين جمهورك

إذا كان المنتج أو الخدمة يلّي عم تقدّمن ممتازين، فإذاً هنّي مخصّصين لفئة محدّدة وعلى الأرجح الطبقة الراقية. وبمجرّد ما تحدّد لمين إنت عم تنتج، بتصير قادر تنتج صحّ.

6. تواصل مع جمهورك

العالم الرقمي اليوم بقدّملك عدّة منصّات بتقدر من خلالها تتواصل مع زباينك الحاليّين والمحتملين. فإذاً لازم دايماً تكون موجود وين ما بكونوا موجودين زباينك وتحديداً على مواقع التواصل الإجتماعي من فايسبوك، تويتر، إنستغرام ... وأكتر من هيك لازم تتفاعل معن وتجاوب بسرعة على أيّ سؤال، استفسار، شكوى أو ملاحظة منّن.

7. اشتغل بحسب نقاط قوتك

مش المطلوب تقوم بكلّ مهمّة بالشركة لأنّ بتكون عم تستهلك كلّ وقتك وطاقتك. ركّز على الأمور يلّي بتشكّل نقاط قوتك واترك الباقي للخبراء بمجال تخصّصن. تذكّر إنّه الوقت من أكبر المسؤوليّات يلّي بتوقع على عاتقك.

8. التميّز بالخدمة قبل المنتج

شو النفع إذا عندك منتج مميّز بس عندك سمعة سيّئة بخدمة ما بعد البيع وخدمة الزباين. بالواقع، برهنت الدراسات التسويقيّة إنّو الزباين بيعتلوا همّ الخدمة أكتر من جودة المنتج والتفاصيل التقنيّة. بالنهاية، ما حدا عباله يكون الضحيّة ويقضّي الوقت رايح جايه.

9. الابتكار والتطوّر دايماً

ما تستسلم لمقولة "إذا ما انكسر لشو تصلحه" لما يسبقك الزمن وتصير من الماضي. لازم تتكيّف مع حاجات الزباين يلّي بتتغيّر مع الوقت. ما فيك تعتبرها مجرّد تفاصيل، لأنّ التفاصيل الصغيرة بتلعب دور كبير عند الزباين يلّي بتدفع كتير.

10. شدّ ورخّي وقت اللازم

بعض الناس بيتّبعوا شعار "اشتغل كتير وتسلّى كتير". بالبداية، لازم تشتغل كتير وتتسلّى أقلّ، وبمجرّد ما يمشي الشغل متل ما لازم، فيك ترّيح راسك وترتاح لتشحن بطّاريتك وترجع بقوّة أكبر، لأنّ أكيد ما بدّك تحرق حالك من أوّل الطريق.

وهلّا، ما عليك إلّا تتبّع النصايح يلّي قدّمنالك ياهن لتكون جاهز تفتح شركتك الخاصّة وتبلّش تحصد النجاحات وتحقّق الأرباح.

انضم الى قناة "Spot Shot by Lebanon Debate" على يوتيوب الان، اضغط هنا




اخترنا لكم

تواصلوا معنا عبر

حمل تطبيق الهاتف المحمول

من نحن   |   إتصل بنا   |   للاعلان معنا

تم تصميم وتطوير الموقع من قبل شركة ايتيك