اختفاء سامر سعادة؟!

نشر النائب سامر سعادة رسالة مؤثرة في اليوم العالمي للمفقودين، فكتب عبر حسابه على موقع "فايسبوك":

"مبارح كان، يوم اختفيت، اختفيت لنهار عن وسائل التواصل الاجتماعي، أهلي، أصحابي ومعارفي قلقوا عليي.
تخيلوا، شخص مختفي عن أهله، مختفي من هل الحياة من أكثر من 30 سنة.
تخيلوا أهله و أحبابه كيف عايشين ؟
أنا من منطقة عانت كتير من الحرب،
تهجير تهجرنا ...
شهداء قدمنا...
منصابين حاملين أوجاعهن وإعاقتهن عنا ...
لكن ببقى الجرح المفتوح، هو جرح كل هل المفقودين المختفين لي ما منعرف عنهن شي.
اخر واحد فيهن عنا، إبن حردين، مفقود الكلمة الحرة و الصحافي، سمير كساب.
من حقنا كلنا، إنه هل جرح يتسكر.
من حقي أنا أعرف مصيرهن، مصير كل لبناني مفقود.
من حق اهلن يعرفوا، مصير اخواتهن وأولادهن.
من حق العايش منهن، يرجع يعيش حياته بيناتنا، بين أهله و أولاده، و يمكن أحفاده لبعد ما شافهن.
من حق لإستشهد منهن، إنه يرجع و يندفن بأرض أجداده.
من حق كل عائلة بلبنان، عم بتعاني، من جهل مصير مفقود، أن تعرف، و أن يتسكر جرحها.
من واجبنا كلنا نوقف معهن، اليوم ، ب اليوم العالمي للمفقودين، و بكل يوم، حتى تنجلى الحقيقة و مصير كل واحد منهن".