سكاف: القصة قصة حياة وموت

تمنت رئيسة "الكتلة الشعبية" ميريام سكاف ان ينظر "العهد الجديد بعين بيئية مجردة ومنصفة لكل يلي عانوا من ضرر مشاريع ملوثة".

سكاف، وخلال لقائها مع اهالي عين دارة، دعتهم الى الاستمرار "متل ما عرفناكن ايد وحدة وقلب واحد وبلدة وحدة وساعتها رح تكتبوا تاريخ جديد لعين دارة"، معتبرة ان المعركة بوجه معمل الموت كما اسمته "اخدت من عمر وصحة ايلي كتير،وقف بوج الريح تصار جبل، الآدمية بمسيرتو توجت بالمواجهة الاخيرة بمعمل الاسمنت وما رضخ لكل الضغوطات".

وأضافت :"من زحلة الي جربت المجرّب بنقلكن انو الحق ما بضيع ، هالمعركة يلي خاضها ايلي سكاف قدرت تبعد الضرر عن مدينتنا بفضل وقفة اهل زحلة واصرارن"، وتابعت :"انتو يا اهل هالارض عندكن مخزون قوة نابعة من الحق ما حدا بيقدر يعملوا حقد، القصة مش نقمة ولا هواية ولا افتعال مشكل،القصة حياة وموت".

وأردفت :"رح يوهموكن انو المشروع ما فيه اي ضرر بيئي وع شوي يمكن بينتج ورد وبيسقي زرع وبيعّمر مدن بس انتو بتعرفوا قبل غيركن انو هيدا سم ما الو اسم تاني، كل هالمحاولات مرقت من عنا ومش علينا رح يوهموكن انو ماشيين وفق القانون بينما الحقيقة عم بيجيبوا القانون لعندن وبطريقتهن المعهودة".

واعتبرت ان التهويل والتخويف والاستقواء بالسياسة والقضاء "ما قدروا يصنعولن معركة رابحة.. ما قدروا لهالساعة ينفذوا مخطط معمل الموت وعالارض ما رح ينكتبلوا حياة".