ميريام سكاف: "ما حدا يجرّب يبيعنا مواقف"

في الذكرى الخامسة لـ رحيل ايلي سكاف، توجّهت رئيسة الكتلة الشعبية ميريام سكاف للراحل بالقول:"العالم صار معتقل والألم سكن بيناتنا وجهاز التنفس الي كان رفيق ايامك الاخيرة, هوي اليوم جهاز لملايين الموجوعين, ومن بعد ما رحت، تعبت روايا الارض".

وتابعت سكاف, أنه, "صار حلمنا اليوم انو نهزم كتير من الامراض الي تكوّمت فوق كتافنا, بنحكيك عن ألم الناس من جائحة العصر ؟ او عن اوجاعهن الكبيرة من وطن مريض "؟

وأضافت, "اليوم متل ما بتمنى الشفاء لكل مين اختبر هالوباء, كمان بتمنى الشفاء لبلدنا, الي عم يمرق فيه بلدنا هوي,كورونا سياسية اجتماعية اقتصادية حياتية, والخوف انو لبنان الي صار على جهاز تنفس, يكون عم يمرق بالنفس الاخير".

وأكدت سكاف , أنه "متل ما عم بنصلّي للموجوعين عم نتلي الصلوات لبلدنا ولشعب آمن بوطنو وتمسك بارضو".

وأضافت, "جرحك يا بيروت علّم فينا والي راحوا ما كانوا رقم, لا ما رح ننسى الي مرق عليكن ولازم تكون جروحكن هيي رسالتنا, ما رح ننسى انو حقيقتكن بعدها غامضة، وانو ٢٠٠ ضحية والاف الجرحى ومئات البيوت المدمرة بعدها عم بتفتش عن سر الموت, حقكن علينا يا اهل مدينتنا , ولازم يضل صوتنا عالي, شي مرة خلّونا نشعر انّا بدولة بتحترم ضحاياها
وناوية تخبرهن كل الحقيقة" .

وقالت: "حقنا كلبنانيين بشكل عام نعرف كامل هوية المجرمين الي كان قتلونا من بعد ما سرقونا وبشّرونا بجهنم, مين سرق حلم عمرن؟ مين تركهن بمصير مجهول لحتى صاروا يتمنوا الهجرة والسفر بعبّارات الموت؟ وبنستغرب ليه كان في ثورة بتشرين؟ هيدا اقل الايمان انو الناس تنتفض ع واقعها, وتندلع ثورة ناس من انقى الثورات بعالمنا الحديث بعضكن استقال شكليا, وقلبو مع السلطة, والبعض الاخر هوي سلطة ومش قادر ع المواجهة".

وأضافت, "نواب بتكتل, وبتغرد خارج السرب, ونواب خرجت من السرب وتخصصت بالتنظير, ما حدا يجرّب يبيعنا مواقف".

وأكدت سكاف, "جوابنا انو كنتو آداة وملحقين وما فكرتوا الا بمصلحة احزابكن وتياراتكن مش بمصالح اهلنا, واذا بدنا نحكي ع قدنا, ع قد مدينة زحلة, وين نوابنا من كل الي صار" ؟

وأردفت, "متل ما بنلوم دولتنا ، كمان في لوم كبير ع كل مواطن بينجرف ورا المذهبيات والحزبيات وبيقبل انو يكون " كيس رمل " للزعامات" .

أما عن الحكومة قالت سكاف, "رئيس بيتكلّف وما بيقدر يألف، حكومة تصريف ما بتصّرف ، رئيس راح بتشرين اول وراجع بتشرين تاني, واذا انتو ما بتحسوا, لا ،نحنا شعب بيحس وعندو من نفسو وكرامتو, وبكل خيبة امل عم بنشوفكن من تشرين لتشرين, راجعين لنقطة الصفر، ولا كأنوا شي تغيّر".

وأضافت, "حطيتونا على معادلات اقليمية وانتخابات اميركية وصراعات ايرانية سعودية واميركية ووساطات فرنسية وترسيم حدود لبنانية مع اعداء اسرائيلية".

وختمت رئيسة الكتلة الشعبية, "بتشعر انو لازم ترجع للارض, لتّربي فيهن الارض, وعلى مشارف الذكرى الاولى لثورة 17 تشرين العظيمة بنجدد املنا بالتغيير".