موظفو تلفزيون المستقبل يعرضون ممتلكاتهم للبيع!

تعود إلى الواجهة مأساة الموظفين في تلفزيون المستقبل على أبواب شهر رمضان المبارك.

المعانات تلك المستمرة منذ 8 أشهر، تشتد على الموظفين الذين لا يتقاضون رواتبهم منذ ذلك الحين، ما أوقعم في مشاكل وأعباء مالية ضخمة دفعت بعضهم لعرض أثاث منزله للبيع، وفق ما يؤكد الموظف في القناة "محمد زين عقل".

"عقل" الذي إتخذ من حسابه على موقع "فايسبوك" منصة لعرض مشكلة باتت مدتها تفوق العام، قال: "اليوم وبمناسبة اول يوم بشهر رمضان المبارك فكرت أكتب شي , عن إن كيف في شغلي بالمستقبل لا نقبض رواتبنا منذ فترة تتجاوز العام تقريباً، وكيف ان البنوك بمن فيها بنك البحر المتوسط (المملوك من آل الحريري) هدد بإرسال أسمائنا إلى البنك المركزي من أجل وضعها على القائمة السوداء لأننا لا نسدد القروض التي اعطوها لنا بناءً على المعاش الذي لا نتقاضاه من القناة"، قائلاً بالحرف: "هم يتكالبوا علينا".

وعرض "محمد" بعض مشاكل زملائه حيث قال: "كان عبالي أكتب بمناسبة انو اليوم بدأ الصيام عن زميل لالنا ( خضر) حمّلوه عالطوارئ بعد ما ابلغوه من البنك بانو لازم يترك بيتو فورا ( عطيوه 15 يوم انذار ت يخلي البيت) لان مش عم يدفع السندات المستحق عليه للاسكان، كان عبالي احكي عن زميلة النا ( غيدا) عارضه عفش بيتها للبيع منشان عيلتها تقطّع هالشهر الفضيل، كان عبالي إحكي عن صديق و زميل الي بالشغل ( وسام) , وأوصف قديش بيوجع ، لما زلمه مترين ب متر بتنزل دمعتو قدامك هوي وعم يحكي عن بنتو الزغيره وانو حلمها تاكل هي وبيّها قطعتين بيتزا بمطعم وهو مش قادر ياخدها لانو مش عم يقبض".

وتابع: "كان عبالي احكي عن أكتر من زميل, أبلغوهن بمدارس الحريري انهن ما رح يقبلوا يسجلوا ولادهن للسنه القادمه بحجة انهن مش دافعين السنه الحاليه".

وختم: "كان عبالي ويمكن واجبي احكي ) و إغضب عني و عنهن و فش خلقي و خلقهن بس رجعت قلت لحالي روق (..) و لازم روق أخيرا كرمال بالمستقبل ما يفهموني غلط , ويفتكروا اني عم بحكي بالعاطل عن التلفزيون , او يفهموها اني عم بنشر غسيل مش نضيف ع هالحيط.. اليوم ما رح إكتب ولا حرف بلاها رح امحي كل اللي كتبتو".