دياب يناشد اللبنانيين: هيدا الوباء مش أقوى من يلي مرّ علينا

توجّه رئيس حكومة تصريف الأعمال حساب دياب في رسالة إلى اللبنانيين، بالقول: "بكرا بيبدأ الإقفال بالبلد حتى نتفادى الإنهيار الصحي بمُجتمعنا ونحمي أنفسنا وأهلنا".

وأضاف: "الإقفال بحد ذاتو مش حلّ, الإقفال هو فرصة حتى نرفع من جهوزية البلد الصحية بعد ما ارتفع عدد الإصابات بشكل كبير خلال الأسابيع الماضية".

وتابع دياب: "مين ما بلّش يشعر أنو هيدا الوباء صار أريب منو؟ الأغلبية انتصروا عليه، بس مروا بمعاناة صعبة".

وأكّد: "ما حدا بيأدر يتخيّل النتيجة وردة الفعل إذا كان المصاب الأب أو الأم أو أي فرد من العيلة, الإحساس أنو عم نخسر شخص قريب منّا وما قادرين حتى نودّعه، بيترك فينا جرح عميق، وحزن كبير".

وأشار دياب إلى أن "كتار من الناس انتقدوا قرار الإقفال، وأكيد بتفهّم رأيهم ومعاناتهم الإقتصادية. عم بسمع ردود الفعل من عدة مصادر. ووضع لبنان متل كل دول العالم، المُفاضلة عم تكون بين الاقتصاد وبين صحتنا وحياتنا".

وقال دياب في رسالته: "أنا شخصياً بختار الحياة والصحة أولوية على الاقتصاد، وأكيد أنتو كمان هيدا خياركم، لأن شو إلو معنى الاقتصاد من دون حياتنا؟ ونحن عم نعمل كل جَهدنا حتى نحصل على اللُقاحات يلي بتحمينا من هالوباء بأسرع وقت ممكن، وصحيح أنو هالوباء بعدو أقوى من قدرة الدول على مواجهتو، لكن الحماية منو مش صعبة أبداً, مش مطلوب أكتر من الحماية الذاتية:

"نحط كمامة ونغسل إيدينا دايماً، ونعقّم الإشيا يلي منستخدمها, فينا نعمل هيك؟ فينا نوفّر على حالنا وعلى أهلنا ها المعاناة؟ أكيد فينا".

وأضاف: "اللبنانيين شعب عنيد وقادر يواجه ويتحدّى, هيدا الوباء مش أقوى من يلي مرّ علينا، وكل الإجراءات يلي بتاخدها الدولة ما رح تنفع إذا اللبنانيين ما التزموا بوضع الكمامة والتعقيم والتباعد الإجتماعي".

وسأل دياب: صعبة؟ أكيد لأ؟".

وختم رئيس حكومة تصريف الأعمال حسان دياب: "أنا واثق أنو إذا التزمنا رح نرجع نكون من أوائل الدول يلي بتنتصر على وباء كورونا، متل ما كنّا بالموجة الأولى, عم ناشد كل لبنانية وكل لبناني وكل مُقيم انتبهوا على حالكم حتى تحموا أهلكم وحتى نرجع لحياتنا الطبيعية, الله يحميكم".