بالفيديو: كلمةٌ مؤثرةٌ لإبنة مسعود الأشقر خلال دفن والدها

أُقيمت مراسم دفن للراحل مسعود الأشقر ظهر اليوم الثلاثاء، في كنيسة مار الياس في ديك المحدي.

وخلال الدفن، ألقت إبنته ريسا كلمة العائلة، فتوجّهت إلى والدها بالقول: "بابا، كثير صعبة لإلنا نودعك لإنه ولا يوم غبت عنا بحياتك اليومية وطفولتنا الحلوة يلي قضيناها ببيت تاتا وجدو بمار نقولا وببيتنا بأجواء من الفرح والمحبة، ابتسامتك ما كانت تفارق وجهك بس تشوفنا وحنانك وعطفك كنا نشعر إنك حامينا".

وأضافت، "بس تركنا لبنان ما انقطعت عنا، كل يوم عبكرا وعشية التلفون عنا يدق ونشوف 03703000 وتسألنا شو بابا عايزة شي، وقت نحنا نكون عايزين شي ونتلفنلك ومع مين ما كنت مجتمع، كنت ترد علينا: ألو بابا عايزة شي؟".

وأردفت، "بابا جينا نودعك اليوم لأنه ما رح نشوفك بقى بهالدني وما رح نشوفك سايق الرنج على طرقات الأشرفية وما رح نوعى بكرا عصوتك وعم تغني الفرح بكل البيت ولا ح نسمع صوتك عالتلفون: ألو بابا عايزة شي، أو الو بابا شو مبسوطة".

وتابعت، "بابا بنوعدك انو رح نضلنا ماريا وكريستينا وناي وأنا مع ماما وعمي نبيل وعايلة عمي مارون متضامنين متكاتفين كل مسيرة حياتنا يلي انت رح تكون بقلبها ولإنه انت المثل الحي لرح تقود ضميرنا طول حياتنا ".

وقالت:" بابا إذا مبارح الساعة 6 عبكرا توقفت دقات قلبك، رح تبقى انت النبض يلي حيحركلنا قلوبنا على مدى الايام والسنوات، واليوم عم نشهد انو مش بس نحنا خسرنا البي وتأكد كمان أنو من خلال التصاريح والشهادات عن نضالك بالمقاومة للدفاع عن الوطن والإنسان، آلاف الناس خسروا الأمن وفقدوا الطمأنينة بغياب الإنسان الذي حافظ على كرامة الإنسان ورفع همومهن فوق كل اعتبار آخر".

وأردفت:" الشباب مننساهن، طبعاً لأ، هني جزء من حياتنا من نحنا وصغار عشنا مع الشباب كبرنا ومرة سنين وبعدن شباب، عم يبكوا معنا اليوم ويسألوا: ليش تركتنا اليوم يا بوسي؟، الشباب يلي ما بزمانهن تركوك وبيعرفوا انو انتا ما رح تتركهن، مسعود الريس المعلم هيك كان يناديك عمي نبيل وكان يعيطلك معلم بمحبة وتهذيب مع انو انت خيو الصغير".

وتابعت،" بابا انت رحت وريح بالك لأنو بالبيت في سند ثاني صلب وقوي عم نتكل عليه لنكمل مسيرتك، رفيقة دربك من 45 سنة يلي قضت أجمل ايام حياتها معك، انت كنت قلبها وكل شي لإلها، ساندتك بالأيام الصعبة وشاركتك الأيام الحلوة، بأكدلك انو ماما رح تكمل الإستمرارية تنضل عايشين متلما أنت بتتمنلنا".

وختمت، "بابا بنحبك وبلشنا نشتقلك انت فخرنا ونحنا منحمل اسمك واسمك رح يضل رافعلنا راسنا كل حياتنا ورح نكمل المشوار متل ما علمتنا نعيش بصمود بتواضع واحترام الآخر ونيالنا يا بابا بهيك بي".