سكاف: حروبن الطائفية منعت قيام لبنان

لمناسبة عيد الجيش الـ73، كتبت رئيسة ​الكتلة الشعبية ميريام سكاف على حسابها عبر فيسبوك التالي:

"عيدنا يوم ..أمنك كل يوم..

جيشنا العظيم ، هالمؤسسة القريبة من كل بيت ، البعيدة عن بيوت السياسة. صوت رجال بتقلك عوافي.. بتعطيك الايمان ببلد اخدتو السياسة عالتقسيم والحصص والطائفية.
بيبقالنا وجود هالجيش ..الحصن الي قاعد ببرج عالي وبيطِل منو ع كل الوطن. وبالحرب او السلم ..ما احتمينا الا بمجدك.

عيونك علينا.. بوقت سيوف السياسيين ضد ولاد هالبلد ، وما خلّوا شي موحّد. ما حدا شايف من لبنان قطعة سما ..كلن معتبرينو قطعة جبنة.خبطة قدمكن وحدها اليوم ملءُ عين الوطن. اما البقية من سياسيين وحكومات مصروفة وجايي ورايحة فكلن بيخبّطوا بهالوطن وبيلعبوا بمصير اقتصادو وبيئتو ومؤسساتو.

حروبك صانت لبنان.. وحروبن الطائفية منعت قيام لبنان. وعم توقف اليوم بوج قيام حكومة بتمثل الكل. هيبة العسكر بتمنحنا الامل. وهيمنة اهل السلطة بترجعنا لبلد القبائل. يا ريتهن يلي متحكمين بمستقبلنا بيستلهموا عبارة واحدة من هرمك: شرف، تضحية وفاء.

هني نهار.. وبدّا تغيب شمسو شي نهار، انت تضحية من ٧٣ سنة ..وبعدا شمسك بتشرق من شرق وغرب وبتفيي علينا أمن دايم".