تلت سكّان أميركا تقريباً معن بطاقات ائتمانيّة مع دَين متجدّد. وبكلّ بلدان العالم، الديون يلّي بتسبّبها البطاقات الائتمانيّة بتشكّل مصدر رئيسي للضيقة الماليّة بالنسبة لكتير من الناس، كيف لكن للناس يلّي عايشين ببلد متل لبنان.

لهيك لازم تعمل حسابك تعيش حياتك بلا ديون لتعرف تاخود قرارات حكيمة بكلّ الامور يلّي بتتعلّق بالمصاري. وبس تحطّ خطّة مدروسة وتلتزم فيها، بتكون عم تلغي فكرة الديون من قاموسك.
نحنا بدورنا رح نساعدك تتخلّص منّها:

1. اعرف شو عليك ديون. فكّر منيح لأي درجة إنت مديون. واكتب على ورقة صغيرة شو عليك لكلّ بطاقة مع معدّل الفايدة عليها. لأن الاعتراف بالدَين هو الخطوة الأولى لتتغلّب عليه.

2. الغي بطاقاتك الائتمانيّة. لتقدر تتخلّص من ديونك لازم تتخلّص من البطاقات الائتمانيّة بجيبتك أو تحتفظ فيهن بمطرح بعيد عنّك. وبلّش ادفع كاش قيمة أي غرض بتشتري بدل البطاقة الائتمانيّة لأن هيك بتعرف شو عم تصرف وبتصير تفكّر أكتر بالاغراض يلّي بحاجتها.

3. عدّل ميزانيتك. لازم تلغي المصاريف يلّي منّك بحاجة إلها. اكتب 3 طرق بتخلّيك فوراً تخفّف، تلغي أو تخفّض بعض الخدمات يلّي مشترك فيها، متل اشتراك الساتلايت أو عضويّة نادي رياضي وغيرها. وفيك توفّر كمان متلاً بإنّك تحضّر قهوتك بنفسك بلا ما تضطر توقّف كلّ يوم الصبح عند ستاربكس لتشتري قهوة، لأن إذا جمعتن بيعملولك شي 1000$ بالسنة!

4. اختار طريقة لتسدّد ديونك. أسرع طريقة لتقلّل ديونك هيّ إنّك تسدّد البطاقة يلّي عليها أعلى نسبة فايدة وتدفّع الحدّ الأدنى لباقي البطاقات. وبمجرّد ما تسكّر أوّل بطاقة، بلّش بالبطاقة يلّي بعدها وبعدها لتسكّرن كلّن. والطريقة التانية هيّ بإنّك تسكّر البطاقة يلّي عندها أقل رصيد وتكفّي دفع الحدّ الأدنى لباقي البطاقات. يمكن منّا الحلّ الأفضل لتتخلّص من الديون، بس بالقليلة بتعزّز ثقتك بنفسك بإنّك قمت أوّل خطوة!

5. خلّيك مطّلع ودايماً مركّز. فتّش بالإنترنت على مدوّنات (Blogs) ومنتديات (Forums) بتناقش مواضيع ماليّة وشارك بنقاشات عن الديون. خلّي أهدافك دايماً ببالك، أو بالأحرى اكتبها على ورقة وخلّيها معك وين ما رحت. هيدي الطريقة بتساعدك تفكّر كتير منيح قبل ما تشتري أي غرض.

6. راقب تقدّمك. كلّ شهر أو أكتر، راجع حساباتك وشوف وين صرت وشو حقٌّقت وقوم بتقييم النقاط يلّي نجحت فيها والنقاط يلّي فشلت فيها. إنّك تتخلّص من ديونك منّا شغلة بسيطة وسهلة، بس بمجرّد ما تنجح مرّة وحدة، رح تصير تتمتّع بطعم الربح.

وأخيراً تخلّصت من البطاقات الائتمانيّة وسكّرت ديونك وصار فيك تستثمر مصرياتك بالأمور يلّي بتهمّك وبالمكان الصحّ!‬‬‬